Туган ягын һәм мәктәпне ярата

Хәрби хезмәт үтеп тә ул гражданлык бурычы турында онытмый, үзен халыкка хезмәт итүгә багышлый.

Михаил Терентьев исеме күпләргә билгеле, ә күпләр аның белән якыннан таныш, чөнки ул мәктәптә берничә буын балаларына белем бирә.
Ул 1958 елның 26 ноябрендә Аксубайда дөньяга килә. Сигез еллык мәктәптә белем ала, җирле гимназияне тәмамлый. Аннан соң Казан Дәүләт Педагогия институтында тарих, инглиз теле һәм җәмгыять белеме белгечлеге буенча белем ала. Районга кайтып Иске Ильдеряк урта мәктәбендә тарих укытучысы булып эшли башлый. Тиздән аны комсомолның район комитетына күчерәләр. Биредә озак эшләргә туры килми, армиягә китә.
Хезмәт аның тормышына зур йогынты ясый. Башта Ашхабад шәһәрендә өйрәнүләр үтә, аннан соң Кабулда (Әфганстан) легендар 459 нчы спецназ ротасында хезмәт срогын дәвам итә.. Хезмәт итү җиңелләрдән булмаса да, ул Әфганстандагы сугыш авырлыкларына түзә. Парашюттан 49 тапкыр сикергән өчен парашютист-отличник күкрәк билгесе белән бүләкләнә. Ул хезмәт иткән бригада Иран, Әфганстан һәм Пакыстан чикләрен күзәтү белән шөгыльләнә. Разведкага бара, штурмовикларны, вертолетларны караванга һәм базага юнәлтә. Әлеге 459 нчы рота Әфган сугышы башында Кабул янындагы Амина сарае башында тора.
1983 елның ноябрендә хезмәтен тутырып туган ягына кайта. Бер атнадан соң Аксубай сигез еллык мәктәбенә тарих укытучысы булып килә. Монда 2008 елга кадәр эшли, аның тулы педагогик стажы 25 ел.
Элеккеге укытучылары һәм коллегалары Михаил Терентьев белән эшләгән елларны җылы хисләр белән искә алып сөйлиләр. Ул үрнәк алырлык педагог һәм көрәштәш, үзенең күпчелек укучылары өчен эштә дә, гаиләдә дә идеал кеше.
Укучылары аның белән элемтәдә торалар, кунакка киләләр. Ул укыткан укучыларның балалары да аның белән аралашалар, хәтта. Чөнки лаеклы тәрбия, тирән белем биргәне өчен аларның Михаил Алексеевичка рәхмәтләре чиксез.