Китапханәне җитәкләгән

Тантаналы дата белән котларга район, башкарма комитет, бистә һәм социаль яклау бүлеге җитәкчелеге килде һәм бәйрәм гаеплесенә Россия Президенты Владимир Путиннан адреслы котлау хатын, чәчәкләр һәм бүләкләр тапшырды.

Кырыс, әмма шул ук вакытта гадел һәм мөлем ханым – Анна Егоровна Рябованы бөтен район белә. Чөнки ул озак еллар Аксубай китапханәсен җитәкли, актив комсомолчы һәм партия әгъзасы, партия оешмасының алыштыргысыз сәркатибе булып тора – районда узган бер генә комсомол һәм партия конференциясе дә аның катнашыннан башка узмый.

Ул партия линиясе буенча республика чараларында күптапкыр районны тәкъдим итә. Һәм болар барысы да – аның өчен беренче урында торган төп эше белән үрелеп бара. Аның альбомында әлеге чор фотолары аерым, мактаулы урын били.

Анна үзе хыялланган һөнәрне сайлый. Мәктәпне тәмамлаганнан соң ул бернинди авырлыкларсыз инглиз теле факультетына укырга керә – ул вакытка ул алман телен мәктәп курсы буенча гына белеп калмыйча, аралашуда да киң куллана (Аксубайда мәҗбүр ителеп күчерелгән халык – Идел буе алман кешеләре яши һәм Анна шул гаиләләрнең берсендә яшәүче кыз белән аралаша).

– Безнең 1946 елгы чыгарылышта 9 укучы иде, һәм без барыбыз да югары уку йортларына укырга кердек, өстәвенә җидебез – педагогика институтына, – дип искә ала Анна Егоровна. – Һәм диплом алып, мин мәктәпкә укытырга кайттым – башта Аксубай 8 еллык мәктәбендә, аннары Кәкре Күл мәктәбендә алман теле укыттым.

Кызы Нина туганнан соң, Анна Егоровна Аксубайда эшли башлый, баштан типографиядә кассир, аннары – китапханәдә. 25 яшендә ул инде мәдәният учреждениесен җитәкли, аның оста җитәкләве ярдәмендә китапханә ТАССРның иң яхшы китапханәләре арасына керә.

– Китапханәдә иртәдән кичкә кадәр халык өзелми иде – ике сменада укучылар, укытучылар, комсомол һәм партия оешмалары лидерлары килә иде, – дип бүлешә Анна Егоровна. – Чөнки китап һәр заманда төп белем чыганагы булып торды һәм тора. Китап уку аек, анык фикерләүгә ярдәм итә. Һәм шәхес формалашу процессының алыштыргысыз өлеше булып тора.

Директор үзе һәрвакыт белем алуга тартыла. Һәр яңа китапны, һәр яңа журналны калдырмыйча укып бара, актив укучы буларак, аның шәхси кабинетында кичкә кадәр ут сүнми, ишекләре хезмәткәрләр һәм укучылар өчен һәрвакыт ачык була. Китапханәче һөнәрен гамәлдә генә танып белүдән тыш, аны теориядә дә өйрәнү өчен ул  “Китапханә эше“ белгечлеге буенча Петербург мәдәният институтын тәмамлый.

Юбилярны котларга килгән китапханә хезмәткәрләре Анна Егоровна җитәкләгән елларда Аксубай китапханәсенең югары күрсәткечләргә ирешкән өчен күчмә Кызыл байрак белән бүләкләнүен, һәм аның  озак еллар дәвамында кабаттан шул коллективта калуын искә алдылар.

Иң алдынгы мәдәният учреждениесе буларак, алар Татар республикасы авыл китапханәләре арасында беренчеләрдән булып библиографка ия булалар. Теләсә нинди һава торышында да алар оешмалар һәм предприятиеләр, зур һәм кечкенә авыллар буенча йөреп, укучыларга китаплар алып киләләр. Һәм бүгенге  китапханәчеләр элеккеге җитәкчеләренең  тырыш хезмәт җимешләрен татыйлар.

Күпьеллык һәм фидакарь хезмәте өчен Анна Егоровна Рябовага СССРның атказанган мәдәният хезмәткәре исеме бирелә, ул СССР мәдәният министры Екатерина Фурцева тапшырган Грамотаны ядкарь итеп саклый.

Анна Егоровнаның эшен кызы Нина Степановна дәвам итә, ул лаеклы ялга чыкканчы яраткан китапханәсендә хезмәт куйган. Ике оныгы әбиләрен уңышлары белән сөендерәләр, алар өчен ул – тормыш һәм һөнәргә тугрылык үрнәге.