Җитмеш ел матур гомер итәләр

Күптән түгел аларның йортында күңелле бәйрәм булды. Тантана өчен ике бик әһәмиятле сәбәп булды: Фәйзрахман Мәсгут улы белән Мәсания Хабибулла кызының бергә гомер итүләренә җитмеш ел һәм гаилә башлыгына 90 яшь тулды.

Йортта ир белән хатынның якыннары – туганнарының балалары, аларның оныклары җыелды. Юбилейга Мәсгутовлар янына район вәкилләре килде. Район башкарма комитеты җитәкчесенең беренче урынбасары Илшат Моратшин юбилярны 90 яшьлек юбилее белән котлады. 

– Сез сугыш, ачлык, ялангачлык кебек авыр сынаулар аша үттегез, авыр елларда район иминлеге өчен хезмәт куйдыгыз, – диде ул.  – Район җитәкчелеге исеменнән озак еллар намуслы хезмәтегез өчен чын күңелдән рәхмәт белдерәм. Ул ветеранны туксанынчы туган көне белән котлады. Район вәкиле бүләк иткән чәчәк бәйләмен тантана сәбәпчесе шунда ук янәшә утырган хатынына бүләк итте.

Илшат Моратшин Россия Федерациясе Президенты Владимир Путинның Котлау хатын һәм район бүләкләрен укыды. Котлауларга социаль яклау бүлеге консультанты Елена Золина, Карасу авыл җирлеге башлыгы Фәнгат Идиятуллин да кушылды. Алар юбилярга озак елларга җитәрлек сәламәтлек, бәхетле гаилә тормышы теләделәр. 

1949 елда өйләнешкәннәренә кадәр Фәйзрахман ага белән Мәсания апа күп кайгы-хәсрәт күрергә өлгергәннәр. Икесе дә кулак тамгасы салынган гаиләдән. Йорт хуҗасы үз гаиләсенең тарихын, аларны ерак Камчаткага (ярты ел барганнар!) ничек җибәрүләре, ә берничә елдан соң кире өенә кайтканда, өйләренең урынында булмавы, тормышны яңадан җайга салу өчен, мең михнәтләр кичеп яңа өй төзүләре турында сөйләде.

Авыр хатирәләрне яңартып сөйләгәндә Фәйзрахман бабайның күз яшьләре  агылды. Күп еллар ул  колхозда балта остасы булып эшли, хатыны балалар бакчасында пешекче булып эшләсә дә, колхоз эшләреннән бер дә  калмый. Ир белән хатынның үз балалары булмаган, әмма алар картлык көннәрендә ялгыз түгел. Гомер буе алар сеңелләренең терәге булып, аларның балаларын тәрбияләүдә катнашканнар. 

– Фәйзрахман абый белән Мәсания апа безнең өчен һәрвакыт эштә намуслылык, гаилә мөнәсәбәтләрендә кайгыртучанлык үрнәге булды, – диде бертуганнар. – Алар яхшы, изге кешеләр. Без бик иртә әтисез калдык, абый аның урынына иде. Алар безгә һәрвакыт ярдәм иттеләр. Алар үстерергә булышкан балалар бүген  аларның картлык көннәрендә таяныч булып торалар. Бәхеткә, алар шул ук авылда яшиләр, һәр көн килеп хәлләрен белешәләр. Алар әйтүләренчә, киләсе юбилей – Мәсания Хәбибулла кызыныкы. Аңа әлегә 89 яшь.