Чәчәкләр – тормыш бизәге

Шушы урамда яшәүче бер ханымның роза гөлләренең төрле сортларын үстерүе хакында күп кешедән ишеткәне,tp булды. Ул Рәмзия Паймулкина, без аңарда кунакта булдык. Чыннан да Рәмзия ханымның бакчасы төрле чәчәкләргә күмелеп утыра. Рәмзия Рәхимҗан кызы гомере буена товаровед булып эшләгән, чәчәкләр үстерү аның яраткан шөгыле.

– Эшләгән вакытта чәчәкләрне тәрбияләргә вакыт бик юк иде. Хәзер исә, лаеклы ялда булгач – көне буе бакчада. Кайчак вакытның күпме икәнен дә онытып җибәрәм хәтта, – ди Рәмзия ханым.

Зур булмаган участокта бакча гөлләренең нинди генә төре юк, тик иң мөһим урынны, иң гүзәл чәчәкләрнең берсе – розалар алып тора. Рәмзия Рәхимҗан кызы аларны патшабикәләргә тиңли. Барысы да гөл-чәчәкләр яратудан башланган. Сатып алып утырткан гөлләре шаулап чәчәк атып, хуҗабикәне сөендергән. Башта берничә генә төрле роза гөле булса, хәзер аларның төре 150 дән артып киткән.

– Роза гөлләре зур тәрбия, хезмәт сорый. Алар артык нәзберек, даими карап торырга кирәк. Хәтерләвемчә, мин аларны ботактан гына үрчетеп җибәрә алмадым. Алар һәрвакыт һәлак булалар иде. Шуңа күрә мин әзер үсентеләр сатып алам яисә интернет аша алдырам

Аның бакчасында матурлыгы, тыйнаклыгы белән күңелләрне җылыткан башка чәчәкләр дә бихисап: лилия, хризантема, гортензия, космея, юкка, кактуслар, мәңге яшел пираканта, хайдкот, монарда бакча бергамоты, су гиацинты һәм хәтта ромашкаларның төрле төре шау чәчәктә утыра. Бу аларның бик аз өлеше генә әле. Күбәләк куагы (Давид Буддлеясе), роза гөленең кара магия сорты, клеопатра уклары (эремурус), «ватылган йөрәк» (дицентр), яңгыр чәчәге (зефирантес) һәм башкалар да хуҗабикәне купшы гөлләре белән сөендерәләр.

Ә шул көннәрдә Рәмзия Паймулкина ирис гөлләре суганчалары белән посылка алган. Хуҗабикә әйтмешли, хәзер бары тик шулкадәрле чәчәк арасында алар өчен урын гына табасы бар.

Рәмзия Рәхимҗан кызы чәчәкләрне сату өчен үстерми. Ул һәвәскәр чәчәк үстерүче. Рус Кармәте Казан Богородица чиркәвенең престол бәйрәмендә җирле чиркәүнең ярдәм сорап аңа мөрәҗәгать итүе гаҗәп түгел.

Элек-электән гыйбадәтханәләрнең эчен бизәү өчен тере чәчәкләр, төрле үләннәр һәм шулай ук агач ботаклары кулланылган. Бу Ходайга ярату һәм хөрмәт булып торган. Иконаларны да чәчәк композицияләре белән бизиләр.

– Югалган җәннәт турында искәртеп, чәчәкләрне безгә Ходай калдырган. Алар күзләрне иркәләп кенә калмыйча, безнең тәкәбберлегебезне дә юкка чыгара, – ди Иоанн атакай, чәчәк түтәлләренә сокланып.

Рәмзия Паймулкина үзенең йорт яны участогының һәр почмагын чәчәкләр белән яратып бизи. Ул үзе үстергән гөлләр белән хозурлана, алар белән серләрен бүлешә. Күршеләре аңардан роза гөлләре ботаклары, лилия суганчалары, башка чәчәкләрнең орлыкларын еш сорап киләләр. Һәвәскәр гөлләр үстерүче ханым аларның гозерен беркайчан да кире какмый. Чәчәкләр шатлык һәм матурлык чыганагы, алар безнең тормышыбызны бизи, ди ул.

Күбрәк фотоларны әлеге сылтама буенча карагыз.