Бер көнне һәм бер сәгатьтә туганнар

Алар Иске Ильдеряк авылында укытучылар гаиләсендә 1960 елның 17 февраль көнендә дөньяга киләләр. Гомерен мәктәп эшчәнлегенә багышлаган, башлангыч сыйныфлар укытучысы булып эшләгән әниләре Вера Ивановна алар өчен һәрьяктан үрнәк була.

7 яшьтә беренче сыйныфка укырга баралар, яхшы укыйлар, бигрәк тә физкультура дәресләре җиңел бирелә. Владимир беренче сыйныфта укыганда ук чаңгы, җиңел атлетика ярышларында катнаша, мәктәп, аннан соң район данын яклап чыгыш ясый.

Казан педагогия институтының физик тәрбия бирү факультетын тәмамлаган дипломлы белгеч укытучылык эшчәнлеген үзе белем алган Иске Ильдеряк урта мәктәбендә башлый. Укучыларында спортка, чаңгыга мәхәббәт уята. Алар Аксубай районы, республика дәрәҗәсендәге ярышларда призлы урыннар яулыйлар.

Өлкән укытучы, тренер, РФ мәгарифенең Мактаулы хезмәткәре Владимир Альметкин исәбендә район һәм республика ярышларында җиңүләр күп.

2006 елда Владимир Альметкин «РФның иң яхшы укытучысы» президент программасында катнаша һәм РФ Президенты грантына ия була. Ә 2007 елда ул Татарстан Республикасының иң яхшы тренер-укытучысы исеменә бәйгедә лауреат була. Составында безнең юбиляр да булган район җыелма командасы 20 ел рәттән чаңгы, җиңел атлетика, спортта яраклашу ярышлары буенча республика ярышларында җиңү яулый.

Ул дистәләгән спорт мастерлары, беренче разрядлы спортчылар тәрбияләде. Владимир Васильевич кырык елдан артык барлык спартакиадаларда да ТР мәгарифе хезмәткәрләре арасында җиңел атлетика һәм чаңгы буенча лидерлыкны тота. Вакытка йөгерү, чаңгы ярышларында 1-3 урыннарны яулый.

Ихтыярлы һәм гадел кеше буларак, ул үз-үзеңне тәртипле тоту үрнәге булып тора. Үзенең шәхси үрнәгендә сәламәт яшәү рәвешен пропагандалый. Владимир Альметкин бүген дә яхшы физик формада, мәктәптә эшләвен, район данын яклап ярышларда чыгыш ясавын дәвам итә.

– Казанышларымда шушы ук мәктәптә мөгаллим булып эшләүче хатыным Светлана Викторовнаның да өлеше бар. – Без аның белән шатлыкларны да, кайгыларны да бүлешеп, утыз елдан артык бер сукмактан алтыйбыз. Ул минем ярдәмчем дә, киңәшчем дә, - ди Владимир Васильевич.

Людмила Васильевнаның да ирешкән уңышлары, казанышлары аз түгел. Ул «химия» белгечлеге буенча Ульянов исемендәге Чабаксар дәүләт университетын тәмамлаган.

1982 елда туган Иске Ильдеряк мәктәбендә эшли башлый. Соңрак тормыш кора һәм Яңа Аксубайга күченә һәм мөгаллимлек итүен дәвам итә. 20 елдан артык гомерен балаларга белем бирүгә багышлый. Химия укытучысы булып эшләгән елларда ул үзен квалификацияле белгеч, иҗади хезмәткәр һәм яңа идеяләр белән янып яшәүче мөгаллим буларак таныта. Аның укучылары химия буенча БДИда югары нәтиҗәләр күрсәттеләр. Фәннән сынауларны йөз баллга тапшыручылар да булды.

2006 елда Людмила Васильевна мәгариф бүлегенә методист булып күчә, ул бүгенге көндә дә биредә эшләвен дәвам итә. Ул – таләпчән, ләкин гадел белгеч. Хезмәттәшләре, педагоглар арасында зур абруй һәм ихтирам казана.

Авылның иҗтимагый тормышында катнаша. Нигез салынганнан бирле ул Яңа Аксубай мәдәният йортының "Шанчак" вокаль ансамблендә чыгыш ясый.

Үзенең иҗади хезмәте өчен Людмила Горбунова РФ һәм ТР Мәгариф министрлыкларының, район мәгариф бүлегенең Мактау грамоталары, Татарстан Республикасы Мәгариф министрлыгының Рәхмәт хатлары белән бүләкләнгән.

Фото Владимир Васильевич Альметкин һәм Людмила Васильевна Горбунованың шәхси архивыннан алынды.