Аксубай ветераны әдәбият белән кызыксына

Алар монда яңа китаплар алыр өчен генә түгел, ә китапханә тынлыгында вакытны күңелле итеп үткәрү, яңа тематик китап-журналлар күргәзмәсе белән танышу, интеллектуаль чараларда катнашу, биредә еш булган кызыклы кешеләр белән аралашу өчен киләләр. Авыл китапханәсенең актив китап укучыларының берсе – педагогика ветераны Елизавета Моисеева.

Елизавета Петровна 37 ел Савгач мәктәбендә чуаш теле һәм әдәбиятын укыткан. Элеккеге укучылары аның дәресләрне ничек җылы һәм кызыклы алып баруын, туган телгә мәхәббәт уятуын хәтерлиләр.

Аңа 86 яшь, әмма аның яшен тышкы кыяфәте дә, тормыш позициясе дә расламый.

– Елизавета Петровна бүгенге көндә җәмгыятьтә барган вакыйгалар белән яшь чагындагы кебек кызыксына, – дип сөйли авыл китапханәчесе Наталья Сергеева. – Ул шулай ук чуаш әдәбиятын ярата: классиканы, яшь авторларның әсәрләрен укый.

Элеккеге педагог яшь китап укучыларга туган әдәбияты турында күпне сөйли ала.

Фото: Савгач авылы китапханәсе архивыннан