Аксубай механизаторы авыл хуҗалыгы объектларында “ашыгыч ярдәм” кебек 

Рәмис Хөснетдиновны агрофирма бүлекчәләрендә ”ашыгыч ярдәм” дип атап йөртәләр. Чөнки ул идарә иткән төягеч машинасын төрле йөкләрне, материалларны төяү буенча кичектергесез эшләр башкару таләп ителгән объектларга җибәрәләр.

Кышын Рәмис Исмәгыйль улы агрофирма бүлекчәләренең товарлыклы-сөтчелек фермаларында – терлек азыгы, язгы кыр эшләре чорында ындыр табакларында чәчүлек материал, басуларга озату өчен ашлама төяү белән мәшгуль, ә җәй көне азык җитештерүдә алны-ялны белми эшли. 

Рәмис Хөснетдиновның механизаторлык стажы 20 елдан артык.

– Армиядән кайткач, предприятиегә механизатор булып эшкә урнашкан идем, –дип сөйли Рәмис Исмәгыйль улы. – Бүген дә монда эшлим.

Тракторлар маркалары да бер генә тапкыр алмаштырылмаган, хуҗалык та бер генә тапкыр үзгәртеп корылмаган, әмма механизатор үз һөнәренә һәм коллективына тугры калып, эшләвен дәвам итә. Бүген дә ул иң кирәк, иң җаваплы бурычларны башкара.