Аксубайда Май чабу бәйрәмен үткәрделәр һәм язны каршы алдылар
Аксубай халкы һәм район кунаклары традицион Май чабу бәйрәмен билгеләп үттеләр.
Төп мәйданда ел фасылы өчен борылыш булган тантанага йөзләрчә кеше җыелды. Мәдәният хезмәткәрләре күңелле уеннар, әйлән- бәйлән оештырдылар, сәхнәдән дәртле җырлар яңгырады, әкият персонажлары – Кыш, Яз, Аю, Куян, Кояш, Май чабу керде.
Белем бирү оешмалары вәкилләре мәйданга май чабу сыйлары белән өстәлләр куйдылар. Самавырлар кайнап утырды, халыкны коймаклы чәй, тәм-томнар белән сыйладылар. Гадәттәгечә, Май чабу бәйрәменә «Татмедиа» АҖ филиалы район газетасы редакциясе хезмәткәрләре дә сый тулы өстәлләр белән чыктылар – бәйрәмдә катнашучыларга коймаклар белән сыйланырга, шулай ук «Татмедиа»да басылган газета-журналларны, викториналарны сатып алырга мөмкин иде.
Үзәк китапханә хезмәткәрләре тантанада катнашучылар белән викториналар үткәрделәр.
Кышны дәртле җырлар, әйлән-бәйлән, уеннар белән озатып, халык рәхәтләнеп ял итте.
– Май чабу бәйрәме – ул язның килүен гәүдәләндерә, һәм бу рус халык бәйрәме генә түгел – без аны бергәләп билгеләп үтәбез, коймаклар белән сыйланабыз, – дип мөрәҗәгать итте җыелучыларга район башлыгы Камил Гилманов. – Барысының да кәефе күтәренке. Бу шулай ук бер-беребездән кичерү сорый торган якшәмбе дә. Һәркемнән гафу үтенәсем килә. Мин чын күңелдән җиребездә тынычлык, һәр гаиләдә иминлек булуын телим! Районыбыз чәчәк атсын!
– Бүген Май чабу атнасының соңгы көне һәм минем барысына да язгы кәефләр телисем килә, – диде Феодосий Тотемский гыйбадәтханәсе башлыгы Александр Качаев. – Бу көнне, үпкәләткән кешеләрдән кичерү сорау бик мөһим. Тыныч, саф күңел белән ураза тотыгыз. Ул җиде атна, 16 апрельгә – Пасха бәйрәменә кадәр дәвам итәчәк. Бүген яз килгән кебек, безнең җаннарыбызда да яңару булырга тиеш. Барагызга да яхшы эш-гамәлләрегездә һәм башлангычларыгызда Алланың ярдәме язсын!
Бу көнне Аксубайда гадәттәгечә «Май чабу курчагы» сыннары конкурсы үткәрелә. Районның балалар бакчалары һәм мәктәпләре коллективлары берсеннән-берсе матур курчаклар ясыйлар. Мәртәбәле жюри традицион конкурска йомгак ясады. Бәйрәм сәхнәсендә призерларны бүләкләделәр. Тамашачыларның көчле алкышлары астында төп бүләкне «Буратино» балалар бакчасы яулады, икенче урынны – 2нче Аксубай урта мәктәбе, өченче урынны 3нче Аксубай урта мәктәбе алды. Үзенчәлек өчен бүләкне “Кояшкай” һәм “Ләйсән” балалар бакчаларына да тапшырдылар.
Мәйданда халык күңел ачты, әйлән-бәйләндә, уеннарда һәм конкурсларда катнашты.
Бәйрәмнең кульминацион мизгеле кар өеп ясалган тау башында урнаштырылган салам курчакны яндыру булды.
Следите за самым важным и интересным в Telegram-каналеТатмедиа
Нет комментариев