Үрнәк кеше

Татьяна Васильевнаны компетентлы һәм балаларны яратканы өчен генә түгел, әти-әнисе - кайчандыр бөтен республикага танылган «Аксубай» совхозы ветеринария хезмәтенең җитәкче белгечләре-Нина Алексеевна һәм Василий Андриянович Романовлар балачактан тәрбияләгән тапшырылган эшкә югары җаваплылык хисе тойганы өчен дә хөрмәт итәләр. Казан пединститутын тәмамлаганнан соң Татьяна Романова мәгариф бүлеге тарафыннан Иске Ильдеряк урта мәктәбенә җибәрелә. Ә берничә елдан соң гаиләле кеше буларак Аксубайга кайта һәм гимназиядә физика фәнен укыта башлый. Хезмәткә тугрылык, үзенә карата таләпчәнлек, шул ук вакытта кешеләр белән аралашуда гадилек сыйфатлары өчен аны коллективта бик тиз үз итәләр һәм әлеге сыйфатлар тәрбия эше буенча директор урынбасары итеп билгеләнүдә дә зур роль уйный. Әлеге вазифада Татьяна Васильевна югары квалификацияле категория ала. Аксубай гимназиясенең инновацион гомумбелем бирү учреждениеләренең Бөтенроссия һәм Республика конкурсларында җиңүче һәм күп тапкыр «Татарстанның иң яхшы мәктәпләре» район һәм республика конкурслары призеры һәм лауреаты булуында аның да хезмәт өлеше бар.

Мәктәптәге барлык тәрбия эшләре, шул исәптән авыр яшүсмерләрне тәрбияләү дә-Татьяна Васильевна җилкәсендә. Әлеге процесс уңышлы барсын өчен ул коллегасында аның иҗатына хас сыйфатларны күрә һәм аңа алга таба үсәргә ярдәм итә белергә тиеш. Әлеге мәктәп педагоглары-барлык инновацияләрдә, шул исәптән «Мәктәп-электрон белем бирүдә компетентлылык үзәге» кебек мәгълүмати технологияләрне кертүдә дә алдынгылыкны тота.

Татьяна Васильевна ана буларак та бәхетле ханым, балалары Сергей һәм Катя аңа теләсә нинди хәлдә дә ярдәм итәләр, хуплыйлар.

Татьяна Прохорова балаларга белем бирүдә армый-талмый хезмәт куйганы өчен «Белем бирү өлкәсендәге хезмәте өчен» күкрәк билгесе Һәм РФ Мәгариф һәм фән министрлыгы Грамотасы белән бүләкләнгән.