Ата-аналар – сөенә, балалар – горурлана

Түбәнбаландалылар уен мохитын тулыландыру өчен кызыклы ысул уйлап тапканнар.

Алар балалар бакчасына йөрүче нәниләрнең әти- әниләре арасында кул астында булган чималлардан ясалган уенчыкларны кулланып иң яхшы уенга бәйге оештырдылар.

Әти-әниләр фантазиягә бай булуларын күрсәттеләр. Алар капкачлар, пластик савытлар, каты кәгазь, каптыргычлар, шырпы тартмаларын кулланганнар. Мисалга, пластик келәмдә тишекләр ясаганнар, балаларның бурычы - әлеге тишекләргә атлас тасмалар кертеп бизәп ясау. Каты кәгазьдән ясалган керпегә инә-каптыргычлар яки кояш нурлары ясаганнар. Шырпы тартмасына хәреф ябыштырылган, ә балалар хәреф буенча тартмада нинди яшелчә ятканын белергә тиеш иде.

-Элек шундый уенннарны тәрбияче оештыра иде, - дип сөйли Түбән Баланда комплексы мөдире Ольга Копанева. - Хәзер бу уеннарга ата-аналар да теләп кушылды. Бердәм эшчәнлек үз җимешләрен китерде. Балалар горурланып, уеннарны күрсәттеләр, әти-әниләре белән бергә эшләүләре, чимал җыюлары, рәсемнәрне ябыштырулары турында сөйләделәр.