Игелекле эшләре өчен мактаулы исемгә лаек булды

 Ярты гасыр гомерен ул бер предприятиегә багышлаган – мондый фактлар район тарихында бик сирәк. Аның хезмәт биографиясе 1973 елда башлана. Мансур Гыймалетдинов, СССР Кораллы Көчләре сафларында (Забайкальеда) хезмәт итеп, туган авылы Иске Ибрайга кайта. Һөнәр турындагы мәсьәлә килеп баса.

– «Сельхозтехника» директоры Залаков мине үз предприятиесенә эшкә чакырды, – дип искә ала Мансур Сәхабетдин улы. – Ул вакытта линия-монтаж цехы авыл хуҗалыгы техникасын, җиһазларны ремонтлау белән шөгыльләнә иде. Бу районда иң мөһим объектларының берсе иде, анда иске техникага яңа сулыш өрделәр. Мин шунда эшли башладым.

Әмма үзгәрешләр заманы килде. Предприятие дә үзгәртеп кору кичерде һәм ЛМУ өчен дә борылыш мизгеле җитте. Ике меңенче елларда барлык күрше районнарда да мондый эшчәнлек юнәлеше бетерелде. Аксубай линия-монтаж участогын саклап кала алалар һәм ул бүгенге көндә дә авыл хуҗалыгы берләшмәләренә хезмәт итә, кулланучыларга хезмәт күрсәтә. Биредә терлекчелек фермалары җиһазлары ремонтлана, агрегатларны ремонтлаганда эретеп ябыштыру өчен кирәкле материалларны тәкъдим итәләр һәм тагын күп кенә мөһим операцияләрне башкаралар.

Мансур Сәхабетдин улы районда хәйрия эшләре белән дә билгеле. Бу әйләнә-тирәдә барган вакыйгаларга битараф булмаган, үз катнашы белән ярдәм итәргә әзер булган кеше. Ул Аксубай мәчете төзелешендә турыдан-туры катнаша. Игелекле эшләр җыелмасында – мәчет тирәсен киртә белән тотып алу, хуҗалык бинасын төзү, мөселман зиратын койма белән әйләндереп алу, православие зиратында да шулай ук территорияне зурайтуда, коймалауда һәм башка күп кенә эшләрдә ярдәм иткән.

Хәләл җефете Рушания Рәхимҗан кызы белән ул һәм кыз тәрбияләп үстергәннәр, җиде оныкларын тәрбияләшүдә ярдәм итәләр.