Эш белән бәхетле

Татьяна Пивоварова тормышындагы истәлекле мизгелләрнең барысы да әтисенең эше белән бәйле.

Василий Удяков һәрвакыт җитәкче урыннарда эшли. Чираттагы билгеләнештән соң ул гаиләсе белән яңа яшәү урынына күчә. Аның соңгы вазыйфасы-дуңгызчылык-автомат директоры урынбасары.
1976 елда бухгалтерлар училищесын тәмамлаганнан соң ул әтисе кул астында эшли башлый. Яңа гына эшли башлаган белгечкә әтисенең абруена тап төшермичә, тырышып хезмәт куярга туры килә. Ул башкаларга караганда, аңардан күбрәк таләп итә.
Бухгалтер-икътисадчының эше тавык чүпләп бетермәслек-хезмәт хакы исәпләү, отчетлар, контроль - исәп һ.б. Хуҗалыкта ул вакытта 160 ка якын кеше исәпләнә иде. Үз вакытында әлеге предприятие үзенең җитештерү күрсәткечләре белән бөтен республикага таныла. Әлеге уңышта Татьяна Васильеваның да хезмәт өлеше зур.
Аңа төрле вакытны күрергә туры килә-производствоның бөлгенлеккә төшүен дә, үзгәртеп коруларны да. Әмма ул да, башкалар кебек, бүтән оешмага китү җаен эзләми, үз урынында кала һәм үз коллективы өчен борчылып хезмәт куя. 35 ел эшләү дәверендә биредә алты җитәкче алышына. Хәзергесе-җиденче. Әмма бүгенге көн борчу тудырмый, предприятиедә хәл тотрыклы.